Pag-apruba ng P6.00 Dagdag sa COLA
ng mga Manggagawa sa Bicol, Pambabarat!
BAGONG ALYANSANG MAKABAYAN-BIKOL, October 15, 2007
Help us
propagate
this
article,
DIGG IT!
Inaprubahan na ng Regional Tripartite Wage and Productivity Board-Bicol
ang dagdag na Cost of Living Allowance o COLA ng mga manggagawa sa
Bicol. Subalit mas maliit ito sa binarat na P12.00 dagdag sahod na
inaprubahan ng nasyonal, P6.00 na piso lamang o kalahati ng inaprubahan
ng DOLE.
Para sa BAYAN-Bicol ang P6.00 umentong ito sa sahod ng mga manggagawa
ay hindi man lang makakasapin sa kumakalam na sikmura ng mga
manggagawang Bikolano lalo ngayong pataas ng pataas ang presyo ng mga
pangunahing bilihin. Kung tutuusin sa pamasahe pa lang papunta sa
pinagtatrabahuhan nila ay kulang pa ito sa minimum sa pasahe lalo na
kung maipapatupad pa ng P1.50 dagdag sa pasahe. Ang dagdag na sahod na
ito ay nagmimistulang limos lamang sa mga manggagawa at hindi man lang
makakapantawid gutom. Ang kailangan ng mga manggagawa ngayon ay
nakabubuhay na sahod at hindi dagdag limos. P125 pa rin ang panawagan
nila na dagdag sa sahod ng mga manggagawa sa buong bansa.
Ipinagyayabang ngayon ng administrayong Arroyo ang gumagandang
ekonomiya. Ayon kay Gng. Gloria tumataas ang halaga ng piso laban sa
dolyar at dumarami ang mamumuhunan sa bansa patunay raw ng lumalagong
ekonomiya. Ngunit hindi ito ramdam ng mga maliliit na mamamayan
partikular ang mga mamamayang Bikolano. Noong nakaraang linggo lamang
ay tumaas ang presyo ng mga pangunahing bilihin partikular ang asukal
na umaabot na sa P40.00 ang kilo at ang bigas na umaabot na sa P29.00
ang kilo. Kung patuloy na lumalago ang ekonomiya bakit kailangang
baratin ang umento sa sahod ng mga manggagawa at bakit hindi mapigilan
ang pagtaas ng presyo ng petrolyo at iba pang pangunahing bilihin.
Ito ay manipestasyon lamang na ang ipinagyayabang ng pamahalaang Arroyo
na gumagandang ekonomiya ay pawang kasinungalingan lamang upang
pagtakpan ang tunay na kalagayan ng mga mamamayan . Nais lamang ng
rehimeng Arroyo na bigyang katwiran ang hindi nito pagbibigay pansin sa
mga batayang serbisyong kailangan ng mga mamamayan. #